အနုပညာအရ လက်ညှိုးထိုးပြစရာ တစ်ကားမှ မရှိခဲ့ဘူးလို့ဆိုတဲ့ သူထူးစံ

ခပ်မိုက်မိုက်၊ ဂျစ်ကန်ကန်၊ ခပ်ကြမ်းကြမ်း ဇာတ်ရုပ်ရိုက်ချက်တွေနဲ့ ပရိသတ်တွေရဲ့အားပေးမှုကို ရရှိထားတဲ့ သူထူးစံကို သူ့ရဲ့အနုပညာခံယူချက်၊ သဘောထားလေးတွေကိုမေးဖြစ်ခဲ့တာကတော့

သူထူးစံရိုက်ခဲ့တဲ့ရုပ်ရှင်ဇာတ်ကားတွေက ဟာသဇာတ်ကားတွေ အရိုက်များတာတွေ့ရတယ်။ အခုနောက်ပိုင်းကျတော့ သမန်းကျား၊ မှော်ကျောက်စာလို ကိုယ်ရိုက်နေကျ မဟုတ်တဲ့ ဇာတ်လမ်းပုံစံတွေကို ဘာကြောင့်ရွေးချယ်ရိုက်ကူးဖြစ်တာလဲ။

                 ကျွန်တော်ရုပ်ရှင်ဇာတ်ကားတွေ၊ ဗီဒီယိုဇာတ်ကားတွေ အများကြီးရိုက်ခဲ့ဖူးတယ်။ ဒါပေမယ့် ရိုက်ခဲ့ရတဲ့ ရုပ်ရှင်ဇာတ်ကားတွေ အကုန်လုံးက အနုပညာအရ လက်ညှိုးထိုးပြစရာ ဇာတ်ကားတစ်ကားမှ မရှိခဲ့ဘူး။ ဒီဇာတ်ကားတွေ ရုံတင်တဲ့အခါမှာ ပိုက်ဆံတွေ ဘယ်လောက်ပဲရရ အနုပညာအရ လက်ညှိုးထိုးပြစရာ တစ်ကားမှ မရှိခဲ့ဘူး။ ဒီလိုပြောရတာကကျွန်တော် ဟာသဇာတ်ကားတွေကို စော်ကားပြီး ပြောတာမဟုတ်ဘူး။ ဟာသကားတွေ အရမ်းရိုက်တာ များသွားရင်တော့ မကောင်းဘူး။ ဒါကြောင့်လည်း နောက်ပိုင်း ကျွန်တော်ဟာသ ကားတွေကို ရှောင်လိုက်တာ။ ရုပ်ရှင်မှာ ဟာသဆို ကျွန်တော် လုံးဝမရိုက်တော့ဘူး။ နိုင်ငံခြားမှာ ရိုက်ရမယ့် ဟာသဇာတ်ကားတွေတောင် ကျွန်တော်ဖျက်လိုက်တယ်။ မှော်ကျောက်စာလို ဇာတ်ကားမျိုးက ကျတော့ ကျွန်တော်ကိုယ်တိုင် ရိုက်ခွင့်ရဖို့ စောင့်နေတဲ့ ဇာတ်ကားမျိုးပေါ့။ ရိုက်ကူးရေးကတော့ အန္တရာယ်အရမ်းများတယ်။ ဆင်အကောင် ငါးဆယ်နဲ့ရိုက်ရမယ်လို့ သိထားတယ်။

ဟာသဇာတ်ကားတွေ ရိုက်ခဲ့တာ သူထူးစံအတွက် အနုပညာမကျန်ဘူးလို့ ပြောခဲ့တယ်နော်။ အခုနောက်ပိုင်းမှာကျတော့ ပရိသတ်တွေအတွက် ဘယ်လိုထူးခြားတဲ့ ဇာတ်ရုပ်မျိုးတွေရိုက်ပြဖို့ စီစဉ်ထားလဲ။

             ဒါကတော့ကျွန်တော်တို့ နိုင်ငံရဲ့ ဆင်ဆာလွတ်လပ်ခွင့်အပေါ်မှာလည်း မူတည်ပါတယ်။ တစ်ချို့တွေ ပြောကြတာတော့ ရှိတယ်။ ဆင်ဆာလွတ်လပ်ခွင့်ရလာပြီဆိုတော့ အရင်ကထက် ပိုပြီးဇာတ်လမ်းတွေ လွတ်လွတ်လပ်လပ် ဖန်တီးခွင့်ရလာပြီလို့ ပြောကြတယ်။ ကျွန်တော့်အမြင် အရတော့ လွတ်လပ်တယ်ဆိုပေမယ့် လှောင်အိမ်ထဲက ငှက်တစ်ကောင်လို ဘဝမျိုးမှာရှိနေတုန်းပဲ။ ကျွန်တော်တို့က လှောင်အိမ်ထဲမှာနေခဲ့တာ နှစ်ပေါင်းများစွာကြာခဲ့ပြီဆိုတော့ ဖွင့်ပေးလိုက်လည်း လမ်းမလျှောက်တတ်သေးဘူး။ ချက်ချင်းမပျံနိုင်သေးဘူး။ ကျွန်တော်တို့ လမ်းစလျှောက်ရဦးမယ်။ ကောင်းကင်ပေါ် ပျံနိုင်ဖို့အတွက်တော့ အချိန်ယူ ရအုံးမှာပါ။

သူထူးစံကို ဇာတ်ရုပ်အကြမ်းတွေနဲ့ ပရိသတ်တွေက အားပေးကြတာများတယ်လေ။ ပရိသတ်တွေမြင်နေကျ မဟုတ်တဲ့ ဇာတ်ရုပ်တွေမှာရော သရုပ်ဆောင်သွားဖို့ရှိသလား။

                  သရုပ်ဆောင်တစ်ယောက်ကတော့ ဇာတ်ကောင် စရိုက်မျိုးစုံမှာသရုပ်ဆောင် ပြဖို့ကြိုးစားနေကြတာပဲ။ ဒါပေမယ့် ကိုယ်က ရိုက်ချင်လို့ ရိုက်ပြတယ်ဆိုပေမယ့် ပရိသတ်တွေရဲ့ အကဲဖြတ်မှု၊ ပရိသတ်တွေရဲ့ အကြိုက်ကိုလည်း ထည့်ပြီးစဉ်းစားရသေးတယ်။  ကျွန်တော်တို့ အနုပညာလောကရဲ့ ဈေးကွက်ပေါ်မူတည်ပြီး စဉ်းစားကြတာဖြစ်တော့ ထုတ်လုပ်သူ တွေကလည်း ဇာတ်ကားတွေအပေါ် မူတည်ပြီး စဉ်းစားကြတယ်။ ကျွန်တော်ကတော့ ကိုယ်လုပ်နိုင်တဲ့ လိုင်းတစ်ခုမှာ အကောင်းဆုံးဖြစ်အောင် လုပ်မယ်လို့ပဲ စဉ်းစားထားတယ်။ အနုပညာဆိုတာ ပြည်သူတွေကို ဖျော်ဖြေဖို့သက်သက် မဟုတ်ပဲ အသိဥာဏ်တွေကိုပါ ဖွင့်ပေးနိုင်ရင် အကောင်းဆုံးပါပဲ။ အဲဒီ့အတွက်လည်း ကျွန်တော်တို့ အနုပညာလောကသားတွေ အကုန်လုံးကြိုးစားရအုံးမှာပါ။ လတ်တလောမှာတော့ ပရိသတ်တွေရိုးမသွားအောင်ဇာတ်လမ်းပုံစံလေး တွေမထပ်အောင်တော့ ကြိုးစားရိုက်ကူးဖို့ဆုံးဖြတ်ထားပါတယ်။
 Trend