ကျောင်းသားလူထု လက်မခံနိုင်သော အမျိုးသား ပညာရေး ဥပဒေမူကြမ်းကို ကန့်ကွက်ဆန္ဒပြရန်အတွက် ခွင့်ပြုချက် တောင်းခံခဲ့သော စစ်ကိုင်းတိုင်း ဒေသကြီး ကန့် ဘလူမြို့ နည်းပညာတက္ကသိုလ် (GTC)မှ ကျောင်းသား ခေါင်းဆောင်အား မြို့နယ်အုပ်ချုပ်ရေးမှူးက ကျောင်းထုတ်ပစ်မည်ဟု ခြိမ်းခြောက်ခဲ့ကြောင်း ကျောင်းသားခေါင်းဆောင်က ပြောသည်။
“မနက်ပိုင်းမှာ ဆန္ဒပြခွင့်သွားတင်တယ်။ ညနေပိုင်းမှာ မြို့နယ်အုပ်ချုပ်ရေးမှူးနဲ့ သမ၀ါယမဥက္ကဋ္ဌ ရောက်လာပြီး အဖေနဲ့အမေကို ကျွန်တော်က ဆန္ဒပြတယ်ဆိုရင် ကျောင်းက ထုတ်ပစ်မယ်လို့ ခြိမ်းခြောက်သွားတယ်” ဟု ကျောင်းသားခေါင်းဆောင် ကိုရဲမျိုးဆွေက ဇွန်လ ၁၁ ရက်တွင်ပြောသည်။
အဆိုပါကိစ္စနှင့်ပတ်သက်ပြီး ကန့်ဘလူ မြို့နယ်အုပ်ချုပ်ရေးမှူးရုံးဖုန်းကို ဆက်သွယ်မေးမြန်းရာ မြို့နယ်အုပ်ချုပ်ရေးမှူးမှာ ခရီးထွက်သွားကြောင်း ဖုန်းလက်ခံသူက ဖြေသည်။
အမျိုးသားပညာရေး ဥပဒေမူကြမ်းတွင် ဗဟိုချုပ်ကိုင်မှုစနစ် ပါဝင်နေ၍ လွတ်လပ်သော ပညာရေးစနစ် မရှိနိုင်ခြင်းတို့ကြောင့် ကိုရဲမျိုးဆွေဦးဆောင်သည့် ကျောင်းသားလူငယ်များက ဆန္ဒပြရန် ဇွန်လ ၁၀ ရက်တွင် မြို့နယ်အုပ်ချုပ်ရေးမှူးရုံးမှ ခွင့်ပြုချက်တောင်းခြင်းဖြစ်သည်။
“ခွင့်ပြုချက်မရပေမယ့် ကျွန်တော်တို့ ဇွန်လ ၁၅ ရက်မှာ ကျောင်းသားပေါင်း ၁၅၀ နဲ့ ဆန္ဒဖော်ထုတ်သွားမယ်”ဟု ကိုရဲမျိုးဆွေက ပြောသည်။
ဗမာနိုင်ငံလုံးဆိုင်ရာကျောင်းသားများ သမဂ္ဂအဖွဲ့ချုပ်မှ မဖြိုးဖြိုးအောင်က“အမျိုးသားပညာရေး ဥပဒေမူကြမ်း ထွက်လာပြီးကတည်းက ကျွန်မတို့အဖွဲ့တွေက ကန့်ကွက်ကြောင်း ကြေညာတယ်။ ကန့်ကွက်လှုပ်ရှားမှုတွေ လုပ်တယ်။ ကျွန်မတို့မှာ ကျွန်မတို့ ယုံကြည်တဲ့ ပညာရေးစနစ်ကို လွတ်လွတ်လပ်လပ် ပြောဆိုခွင့် ရှိရမယ်။ တောင်းဆိုခွင့်ရှိရမယ်” ဟု မဇ္ဈိမကို ပြောသည်။
ဖိုးစိုးသူ
Mizzima - News in Burmese
0 comments:
Post a Comment